प्रचण्डलाई प्रधानमन्त्रीको चेतावनी

'कार्यकर्तालाई नियन्त्रण गर्न सक्नुहुन्न भने अध्यक्षको कुर्सी छोड्नुस्’

पाँचखाल -काभ्रे), २६ मंसिर : प्रधानमन्त्री माधवकुमार नेपालले माओवादीको व्यवहारले शान्तिप्रक्रिया टुंगोमा पुग्न नसकेको आरोप लगाएका छन् । माओवादीको व्यवहारले अन्य दलका साथै अन्तर्राष्ट्रिय समुदायसमेत सशंकित भएको उनको भनाइ छ ।

माओवादीले आफ्नो व्यवहार नसच्याएसम्म राजनीतिक गतिरोध अन्त्य हुन नसक्ने बताउँदै प्रधानमन्त्री नेपालले माओवादीसँग भएका हतियारका कारण पनि समस्या उत्पन्न भएको बताए । 'माओवादीबाहेक अन्य पार्टीसँग हतियार छैन,' एमाले काभ्रेको सातौँ जिल्ला अधिवेशनको शुक्रबार उद्घाटन गर्दै प्रधानमन्त्री नेपालले भने, 'हतियारकै भरमा अरूलाई दास बनाउँछु भन्ने माओवादी दम्भले उप्रति सबै सशंकित भएका छन् ।'

माओवादी लोकतन्त्रप्रति इमानदार नभएको भन्दै प्रधानमन्त्री नेपालले हतियार र सेना छाडेमात्रै उसको इमानदारिता देखिने बताए । 'उसले हतियार र सेना छाड्दै वाइसिएलको संरचना खारेज गरेर लोकतन्त्रप्रतिको प्रतिबद्धता देखाउनुपर्छ,' उनले भने, 'नत्र कोठामा गरिएको प्रतिबद्धताको कुनै अर्थ हुँदैन ।' सेना समायोजन प्रक्रिया पूरा नभई संविधानलाई अन्तिम रूप दिन नसकिने बताउँदै प्रधानमन्त्री नेपालले सेना समायोजनमा सहयोग गर्न माओवादीलाई आग्रहसमेत गरे ।

शान्तिप्रक्रिया समयमै टुंगोमा नपुगे र संविधान निर्माण नभए त्यसको सबैभन्दा प्रमुख दोषी माओवादी हुने उनको भनाइ थियो । 'संविधान समयमै नबने त्यसको दोष माओवादीलाई जान्छ,' नेपालले भने । दलहरूबीच सहमति भए समयमै संविधान बन्नसक्ने उनले बताए । अहिले प्रमुख दलहरूबीच इमानदारिता र आपसी विश्वासको कमी भएको उल्लेख गर्दै प्रधानमन्त्री नेपालले १२ बुँदे सहमतिमा जस्तै विश्वास र सहमतिको आवश्यकता भएको बताए । केही समयदेखि चलिरहेको सहमतिको प्रयासले आशा जगाएको उल्लेख गर्दै प्रधानमन्त्री नेपालले भने, 'यो आशालाई वास्तविकतामा बदल्न प्रचण्डलाई आग्रह गर्छु ।'

माओवादी नेताहरूले सत्ता कब्जा गर्ने धम्की दिँदै हिँडेको उल्लेख गर्दै प्रधानमन्त्री नेपालले माओवादीले अरू दलको विरोधसमेत सहन नसकेको बताए । उनले भने, 'सत्ता कब्जाको कुरा गर्ने अनि अरूले विरोध गर्दा सहन नसक्ने ?' माओवादीका कार्यकर्तालाई नेतृत्व तहले नियन्त्रण गर्न नसकेको आरोप लगाउँदै प्रधानमन्त्री नेपालले कार्यकर्ता तह लगाउन नसके पार्टी अध्यक्षको पद छाड्न प्रचण्डलाई चेतावनीसमेत दिए । 'कार्यकर्तालाई नियन्त्रण गर्न सक्नुहुन्न भने प्रचण्डजीलाई अध्यक्षको कुर्सीमा बस्ने कुनै आधार छैन,' प्रधानमन्त्री नेपालले भने, 'नभए कानुनविपरीत काम गर्नेलाई कारबाही गर्न सरकारलाई सहयोग गर्नुस् ।'

माओवादीले अहिलेको सरकारलाई कठपुतली र दक्षिणपन्थी भन्नुको कुनै तुक नभएको भन्दै प्रधानमन्त्री नेपालले सरकारबाट हटेको पीडाले माओवादी बर्बराउँदै हिँडेको बताए । 'यो कठपुतली सरकार होइन, शानका साथ बहुमत पुर्‍याएर बनेको सरकार हो,' नेपालको भनाइ थियो, 'बहुमत गुमाएर सरकारबाट हटेपछि अहिले उसको पीडा बोलिरहेको छ ।'

कैलाली घटनामा माओवादी नै दोषी रहेको दोहोर्‍याउँदै प्रधानमन्त्री नेपालले सरकारले कुनै पनि हालतमा जंगल कब्जा गर्न नदिने बताए । माओवादीले सरकारमा छँदा ४० प्रतिशत भू-भागमा जंगल विस्तार गर्ने प्रतिबद्धताविपरीत कैलालीमा मान्छे ओसारेर जंगल कब्जा गर्न लगाएको नेपालको आरोप थियो । 'सुकुम्बासीका नाममा धेरै ठाउँमा हुकुमबासीको राज भइरहेको छ,' नेपालले भने, 'अब नक्कली सुकुम्बासीको सम्पत्ति खोस्ने, जरिवाना तिराउने र जेल हाल्नेसमेतको काम हुन्छ ।'

पत्रकार टीका विष्टमाथि माओवादीले नै आक्रमण गरेको प्रधानमन्त्री नेपालको दाबी थियो । सरकारले पत्रकारमाथि आक्रमण गर्नेलाई कुनै पनि हालतमा नछाड्ने बताउँदै नेपालले भने, 'माओवादीबाहेक यस्तो आततायी काम कसैले गर्न सक्दैन, दोषीलाई कुनै पनि हालतमा कारबाही गरेरै छाड्छौँ ।'

कार्यक्रममा एमाले वरिष्ठ नेता केपी ओलीले वर्तमान सरकार ढल्ने सपना नदेख्न माओवादीलाई आग्रह गरे । अहिलेकै सरकारले संविधान निर्माण गर्ने बताउँदै ओलीले भने, 'सरकार ढलेको सपना देख्न छाडे हुन्छ, खल्तीमा राजीनामा बोकेर हामीले सरकार बनाएका होइनौँ ।' देशकै ठूलो पार्टीका रूपमा रहेको माओवादीले संसद्मा गएर वितण्डा मच्चाउन नसुहाउने ओलीले बताए । 'आफूलाई ठूलो पार्टी भन्छ अनि संसद् चल्न नदिएर वितण्डा मच्चाउन खोज्छ,' ओलीको भनाइ थियो, 'माओवादीको यस्तो गैरराजनीतिक चरित्रले समस्या झन् चर्कंदै जान्छ ।'

२८ मंसिरसम्म चल्ने एमाले अधिवेशनले नयाँ जिल्ला कमिटी निर्वाचित गर्नेछ । कार्यक्रममा सहभागी हुन प्रधानमन्त्री नेपाल काठमाडौंबाट हेलिकोप्टरमा आएका थिए । उनी त्रिविको दीक्षान्त समारोहमा सहभागी हुन हेलिकोप्टरबाटै काठमाडौं फर्किएका थिए । दोलखाबाट हेलिकोप्टरमा पाँचखाल आएका नेता ओली पनि हेलिकोप्टरबाटै काठमाडौं फर्किए ।