सबै दललाई विश्वासमा लिन सुझाब

काठमाडौं/ राष्ट्रपति डा. रामवरण यादवले प्रधानमन्त्री माधवकुमार नेपाललाई सबै दललाई विश्वासमा लिएर अघि बढ्न सुझाब दिएका छन् ।

प्रधानमन्त्री निर्वाचित भएपछि दोस्रोपटक राष्ट्रपतिलाई भेट्न शुक्रबार अपराह्न प्रधानमन्त्री नेपाल राष्ट्रपतिभवन शीतलनिवास पुगेका थिए । भेटमा राष्ट्रपति यादवले प्रधानमन्त्रीलाई संविधानविपरीत कुनै कदम नचाल्न सचेत गराउँदै सबै राजनीतिक दललाई विश्वासमा लिएर अघि बढ्न सुझाब गरेका हुन् ।

प्रधानमन्त्री नेपालले भने राष्ट्रपतिसँगको भेट नियमित भएको बताएका छन् । 'राष्ट्रपतिसँग मेरो नियमित र सिष्टाचार भेट हो,' उनले भने । भेटमा मुलुकको समसामयिक विषयका साथै संसद्को जारी गतिरोध अन्त्य गर्ने विषयमा राष्ट्रपतिसँग छलफल भएको उनले बताए ।

संसद्को जारी गतिरोध अन्त्य गर्ने र नीति तथा कार्यक्रम कसरी पेस गर्ने भन्ने विषयमा पनि भेटमा छलफल भएको छ । हिउँदे अधिवेशनको अन्त्य र बजेट अधिवेशन सुरु गर्ने विषयमा ध्यानाकर्षण गराउँदै राष्ट्रपति यादवले संविधानअनुसार अघि बढ्न प्रधानमन्त्रीलाई सुझाब दिएका थिए । राजनीतिक दलहरूको सहमतिमा तत्काल उचित निकास खोज्न पनि प्रधानमन्त्रीलाई राष्ट्रपतिले आग्रह गरेका थिए ।

माओवादीले पेस्की बजेट ल्याउन मात्र संसद्को गतिरोध अन्त्य गर्ने तर सरकारको नीति तथा कार्यक्रम संसद्मा पेस गर्न नदिने घोषणा गरेको एक दिनपछि सरकार प्रमुख र राष्ट्रप्रमुखबीच भेटवार्ता भएको हो । भेटमा प्रधानमन्त्री नेपालले बिहीबार माओवादीसँग भएको वार्ताको बारेमा राष्ट्रपतिलाई जानकारी गराएका थिए । उनले माओवादीलाई पनि विश्वासमा लिएर अघि बढ्ने प्रयास भइरहेको बताएका थिए ।

भेटका क्रममा राष्ट्रपति यादवले शान्तिप्रक्रियालाई निष्कर्षमा पुर्‍याउनु र निर्धारित समयमा नयाँ संविधान निर्माण गर्नु मुलुकको पहिलो दायित्व भएको दोहोर्‍याउँदै राजनीतिक दलहरूबीच सहमति, सहकार्य र एकता नभए संविधान निर्माण र शान्तिप्रक्रिया निष्कर्षमा पुर्‍याउन कठिन हुनेमा प्रधानमन्त्रीलाई सचेत गराए ।

राष्ट्रपति डा. यादव र प्रधानमन्त्री नेपालबीच सरकार गठन प्रक्रिया, राजनीतिक दलहरूबीच मन्त्रालय बाँडफाँडमा देखिएको किचलोका साथै मुलुकको पछिल्लो राजनीतिक अवस्थाको बारेमा समेत छलफल भएको थियो । त्यसक्रममा राष्ट्रपति यादवले सरकार गठन भएको लामो समयसम्म पनि सरकारले पूर्णता नपाएको भन्दै असन्तुष्टि जनाएको शीतलनिवास स्रोतले जनाएको छ ।