ख्यातिलाई ट्याक्सीमै घाँटी थिचेर मार्ने योजना थियो वीरेनको

१३ जेठमै +२ को प्रश्नपत्र दिने बहानामा डेरामा पुर्‍याएर ख्यातिको अपहरण गर्ने

फिरौती लिने र बेहोस ख्यातिलाई ट्याक्सीभित्रै घाँटी थिचेर मारी वीर अस्पतालमा बेवारिसे लास छोड्ने

नयाँ पत्रिका

काठमाडौं, २२ असार

ख्याति श्रेष्ठलाई अपहरणपछि बेहोस बनाएर अस्पताल लग्ने र बीचबाटोमै घाँटी थिचेर मार्ने योजनामा थिए वीरेन श्रेष्ठ । उनको योजना असफल भयो, तर ख्यातिको ज्यान जोगिएन । वीरेनले ट्याक्सीको सट्टा ख्यातिलाई आफ्नो डेरामै मारे ।

१९ वर्षीया विद्यार्थी ख्यातिको अपहरण र हत्या अभियोगमा महानगरीय प्रहरी परिसर हनुमानढोकामा रहेका वीरेनले प्रहरी बयानमा आफ्नो असफल योजनाको रहस्य खोलेका छन् । उनको पहिलो

योजना थियो- अपहरणपछि फिरौती उठाउने र ट्याक्सीमा वीर अस्पताल पुर्‍याएर बेेवारिसे छाड्ने, तर जीवित होइन मारेरै । 'पहिलो योजना सफल भएको भए बेवारिसे लास छाडेर भाग्ने थिएँ, तर दोस्रो योजनामा जाँदा शरीर टुक्रा-टुक्रा पारेर फाल्नुपर्‍यो,' वीरेनले भने ।

वीरेनका अनुसार उनले ख्यातिको अपहरण जेठको दोस्रो साता नै गर्ने योजना बनाएका थिए । उनले १३ जेठमा ख्यातिको अपहरण गर्ने सबै तयारी गरेका थिए । १३ जेठमा दस जोड २ को परीक्षा चलिरहेको थियो । उनले परीक्षा परीक्षाकेन्द्र वरिपरिबाटै ख्यातिको अपहरण गर्ने प्रयाससमेत गरेका थिए ।

वीरेनको बयानअनुसार १३ जेठको बिहान ६ बजे उनी ख्यातिको अपहरण गर्ने तयारीसहित ख्यातिको परीक्षाकेन्द्र रहेको गीतामाता स्कुल विजयेश्वरी पुगेका थिए । उनले परीक्षाकेन्द्र नजिकैको चियापसलमा बसेर ख्यातिलाई फोन गरेर बोलाएका थिए ।

फोनको प्रतिउत्तरमा ख्यातिले 'म आउँदै छु' भनिन्, त्यतिवेला उनी घरबाट परीक्षाकेन्द्रतिर आउँदै थिइन् । करिब ४५ मिनेटपछि ख्याति आइन् पनि, तर एक्लै होइन एउटी संगीका साथमा । उनले एक्लै पछि बस् भन्दा पनि ख्यातिले साथीलाई छाड्न मानिनन्, दुईजना भएकाले वीरेनले अपहरणको हिम्मत गर्न सकेनन् ।

ख्याति परीक्षा दिन विद्यालयभित्र छिरिन् । वीरेनले पुनः फोन गरे । तर, फोन उनकी साथीले उठाइन् । उनको योजना असफल भयो । वीरेनले प्रहरीसँग भनेका छन्, 'त्यो दिन ख्याति एक्लै आएकी भए आजको परीक्षाको प्रश्न मैले थाहा पाएको छु, तिमीलाई पनि भन्दिन्छु हिँड भनी मोटरसाइकलमा राखेर डेरामा लगेर लठ्याउने योजना थियो ।'

वीरेनले पहिलो योजनामा पनि ख्यातिलाई निद्रा लाग्ने औषधि खुवाएर लठ्याएपछि हातखुट्टा बाँधेर राख्ने योजना बुनेका थिए । उनले एनजिटको ट्याब्लेट किनेर कोठामा राखिसकेका थिए । तर, पहिलो योजना असफल भएपछि उनले अपहरणको योजना २२ गतेलाई सारेका हुन् । आफैं अपहरण गर्ने योजना असफल भएपछि उनले मेरिनालाई प्रयोग गरेका हुन् ।

दोस्रो योजनाअनुसार मेरिनामार्फत उनले २२ जेठमा ख्यातिलाई अपहरण पनि गरे । 'त्यो दिन शुक्रबार थियो, सोमबार बिहानसम्म ख्यातिलाई कोठामा ज्युँदै राखेर अभिभावकसँग बार्गेनिङ गर्ने योजना थियो,' बयानमा उनले भनेका छन्, 'शनिबार त बैंक बन्द हुन्छन्, उनीहरूले पनि पैसा कहाँबाट ल्याउनु ? त्यसैले आइतबार बेलुकासम्म फिरौती लिने योजना थियो ।'

शनिबार दिनभर 'बार्गेनिङ' सकेर आइतबार 'क्यास' हात पारेपछि ख्यातिलाई छाड्ने होइन, मार्ने योजना थियो उनको । उनले आइतबार फिरौती लिनुअघि ख्यातिको अनामनगरमा रहेको डेरावरिपरि घुमेर प्रहरीको निगरानीको अनुमगन गर्ने योजना पनि बनाएका थिए ।

प्रहरी आफ्नो पछि नलागेको निश्चित भएमा मोबाइलबाट ख्यातिको बुबालाई फोन गरी पैसा बोकेर बाहिर निकाल्ने योजना थियो उनको । 'मोबाइलमा एकपटक फोन गरेपछि फोन राख्नै नदिई लामो कुरा गरेर ट्याक्सी सहर घुमाउँदै सोह्रखुट्टेमा पुर्‍याएर फिरौती लिने तयारी थियो,' उनले भनेका छन्, 'फोन राख्नै नदिएपछि उनले त्यो कुरा अरूलाई सेयर नै गर्न पाउँदैनथे, मेरो योजना पनि पूरा हुन्थ्यो ।' यसका लागि फोनमा पर्याप्त 'ब्यालेन्स' हाल्ने निर्णय पनि गरेका थिए ।

ट्याक्सी काठमाडौंका विभिन्न स्थान घुमाउँदा प्रहरीले फलो गरिरहेको छ कि छैन भन्ने निश्चित गर्न सजिलो हुने उनको सोच थियो । प्रहरीले फलो नगरेको निश्चित भए सोह्रखुट्टे प्रहरी प्रभागअगाडि रहेको पानपसलमा रकमको थैलो छोड्न लगाउने योजना रहेको उनले बताएका छन् ।

पैसासहितको ब्याग छोडेर ख्यातिको बाबु हिँडेपछि टाढा बसेर केही समय पसलको निगरानी गरेपछि आफू सुरक्षित रहेको निश्चित गरेपछि मात्र फिरौती रकम लिएर कोठामा जाने उनको योजना थियो । फिरौती लिएपछि ख्यातिको हत्या गर्ने योजना बनाएका थिए । तर, हत्या कोठामा होइन गुडिरहेको ट्याक्सीमा गर्ने उनको योजना थियो । वीरेनका अनुसार २४ जेठ आइतबार बेहोसीकै अवस्थामा ख्यातिलाई बिरामी भन्दै ट्याक्सीमा ओम अस्पताल चाबहिलसम्म पुर्‍याउने उनको योजना थियो । ओम अस्पतालबाट ट्याक्सी फेरेर ख्यातिलाई अर्को ट्याक्सीमा राखेर वीर अस्पताल लैजाने उनको योजना थियो । ट्याक्सी फेर्दा प्रहरीको अनुसन्धान कमजोर हुने उनको सोच थियो ।

उनले ओम अस्पतालबाट वीर अस्पतालसम्म ल्याउनेक्रममा बीचबाटोमै ट्याक्सीमै घाँटी थिचेर ख्यातिको हत्या गर्ने योजना बनाएका थिए । 'पछिल्लो सिटमा बसेर बिस्तारै घाँटी थिच्ने योजना थियो, ट्याक्सीड्राइभरले थाहा पाए एक लाख रकम दिने पनि सोचिसकेको थिएँ,' उनले भनेका छन् ।

सिकिस्त बिरामीको बहानामा वीर अस्पतालको आकस्मिक कक्षमा ख्यातिलाई पुर्‍याएपछि आफन्तलाई फोन गर्ने बहानामा अस्पतालबाहिर निस्केर फरार हुने उनको योजना थियो । तर, अपहरण गरेर कोठामा लगेपछि औषधि खुवाएपछि पनि ख्याति चिच्याएकीले उनले रडले हानेर पहिले नै मार्नुपरेको बताएका छन् । 'मेरो योजना सफल भएको भए वीर अस्पतालमा बेवारिसे लास छाडेर भाग्न पाउने थिएँ, तर योजना असफल भयो, लास तह लगाउन शरीर टुक्रा-टुक्रा पार्नुपर्‍यो ।'