संवैधानिक आयोगका सदस्य अमेरिकामा मजदुरी गर्दै

खाती र चुनाराले सिकेको ज्ञान र सीप नेपाली दलितहरूको अधिकारको मञ्चमा होइन, अमेरिकी डिपार्टमेन्ट स्टोरमा सामान बेच्न प्रयोग भइरहेको छ

नयाँ पत्रिका
काठमाडौं, ३ साउन

दलितहरूलाई अधिकार दिलाउन राष्ट्रिय दलित आयोगको नेतृत्वमा पुगेका दुईजना नेता अमेरिका जाने एक मौका पाउनासाथ उतै हराएका छन् । एकहप्ते तालिमका लागि अमेरिका गएका होमबहादुर खाती र कृष्णबहादुर चुनारा उतै नोकरी खोजेर बसेका छन् ।

अख्तियार दुरुपयोग अनुसन्धान आयोग, निर्वाचन आयोग र राष्ट्रिय मानवअधिकार आयोगजस्तै राष्ट्रिय दलित आयोग पनि संवैधानिक अंग हो । तर, दलित आयोगको जिम्मेवार सदस्य बनेका सदस्यहरू आफ्नो र राष्ट्रको प्रतिष्ठा भुलेर रोजगारीमा रमेका छन् ।

चुनारा गत पुस र खाती गत चैतमा कूटनीतिक राहदानी प्रयोग गरी अमेरिका पुगेका थिए । समावेशी र दलित हकहितसम्बन्धी सेमिनारमा नेपालको प्रतिनिधित्व गर्दै अमेरिका पुगेका खाती र चुनाराले सेमिनारमा भाग त लिए, तर उनीहरूले सिकेको ज्ञान र सीप नेपाली दलितहरूको अधिकारको मञ्चमा होइन, अमेरिकी डिपार्टमेन्ट स्टोरमा सामान बेच्न प्रयोग भइरहेको छ ।

आयोग अध्यक्ष रामलाल विश्वकर्माले खाती र चुनारा आयोग सदस्यकै हैसियतमा अमेरिका पुगे पनि अहिले सम्पर्कविहीन रहेको पुष्टि गरे । 'उहाँहरू अमेरिका जानुभएको हो, एक हप्तामा नै फर्किने कुरा थियो, तर र्फकनुभएन,' अध्यक्ष विश्वकर्माले नयाँ पत्रिकासँग भने, 'सम्पर्कको प्रयास गर्‍यौँ, तर भएन ।'

आयोगकी सदस्यसचिव जानका बराहाले त खाती र चुनाराले दलित आन्दोलनप्रति बेइमानी गरेको टिप्पणी गरिन् । 'उनीहरू आयोगको कार्यक्रममा गएका हुन्,' बराहाले भनिन्, 'अमेरिका गएपछि आयोगसँग पूरै सम्पर्कविहीन छन्, उनीहरू उत्तै बेपत्ता भए ।' आयोग स्रोतका अनुसार खाती र चुनारा दुवै हाल अमेरिकाको एक व्यापारिक कम्प्लेक्समा मजदुरी गर्दै छन् ।

खाती एमाले कोटामा ०६४ मा आयोग सदस्य नियुक्त भएका थिए । उनी अहिले पनि एमालेनिकट नेपाल उत्पीडित जातीय मुक्ति समाजका केन्द्रीय सदस्य छन् । त्यस्तै चुनारा कांग्रेस कोटाबाट आयोग सदस्य बनेका हुन् ।

दोलखामा जन्मेका खातीको परिवार कामनपा- १३, चागल डल्लुमा बस्छ भने चुनाराको परिवार बुटवल नगरपालिका-९ शिवनगरमा बसोबास गर्दै आइरहेको छ ।