राजु गोर्खालीलाई छुटाउन मन्त्रीलाई दबाब

नयाँ पत्रिका
काठमाडौं, २१ साउन

पुर्पक्षका लागि थुनामा रहेका काठमाडौंका 'डन' राजु गोर्खालीलाई छुटाउन प्रमुख सत्ताधारी दल एमालेका एक नेता सक्रिय छन् । केन्द्रीय सदस्य मोहमुद आलमले गोर्खालीलाई छुटाउन गृह राज्यमन्त्री रिजमान अन्सारीलाई दबाबसमेत दिएका छन् ।

राज्यमन्त्री अन्सारीले यस सम्बन्धमा खुलेर बोल्न चाहेनन् । 'हेर्नोस्, गृह मन्त्रालयमा आपराधिक व्यक्तिहरूको संरक्षणका लागि पनि धेरै किसिमका राजनीतिक दबाब आउँदारहेछन् । तर, हामीले दबाबमा परेर गलत काम गरेका छैनौँ र गर्नेवाला पनि छैनौँ,' राज्यमन्त्री अन्सारीले नयाँ पत्रिकासित भने ।

केन्द्रीय सदस्य आलमले भने गोर्खालीलाई छुटाउन आफू गृह राज्यमन्त्रीकहाँ गएको कुरा गलत भएको दाबी गरे । 'कसले भन्यो त्यस्तो कुरा ? वहियात कुरा हो,' उनले नयाँ पत्रिकासित भने । आफू गोर्खालीको दाइलाई लिएर राज्यमन्त्रीकहाँ गएको प्रमाणित गर्न पनि उनले चुनौती दिए ।

राकेश लिम्बूको हत्या गरी फरार रहेका गोर्खाली सात वर्षपछि गत २७ वैशाखमा पक्राउ परेका थिए । प्रहरीको मोस्टवान्टेडको सूचीमा रहेका उनको पक्राउपछि काठमाडौं जिल्ला अदालतबाट उनी साधारण तारेखमा रिहा भएको रहस्य खुलेको थियो । उनले अदालतमा प्रमाणको रूपमा पेस गरेको कलैया अस्पतालको पत्रको बारेमा प्रहरीले अनुसन्धान गर्दा अस्पतालले सो पत्र नक्कली भएको लिखित जानकारी दिएपछि प्रहरीले उनीमाथि किर्ते मुद्दा अगाडि बढाएको थियो ।

काठमाडौं जिल्ला अदालतले किर्ते अभियोगमा उनलाई पुर्पक्षका लागि थुनामा पठाउने फैसला गरेलगत्तै लिम्बू-हत्या अभियोगमा जिल्ला अदालतको फैसला उल्ट्याउँदै पुनरावेदन अदालतले पनि उनलाई थुनामा पठाउने फैसला गरेको थियो ।

आलम एमालेको भ्रातृ संगठन नेपाल मुस्लिम इत्तेहाद संगठनका अध्यक्ष हुन् भने राज्यमन्त्री अन्सारी सोही संगठनका उपाध्यक्ष । प्रहरीले 'मोस्टवान्टेड'को सूचीमा राखेका व्यक्तिसित आलमको सम्पर्क रहेको तथा भारतीय एजेन्टको रूपमा काम गरिरहेको दाबी गर्दै उनीविरुद्ध पार्टीमा उजुरीसमेत परेको छ ।

आलम अध्यक्ष रहेको इत्तेहाद संगठनकै महासचिव ताज मोहमद मियाँले पार्टी केन्द्रमा उजुरी हालेका थिए । केही दिनअघि मात्रै एमाले स्थायी समिति बैठकले उनीविरुद्ध परेको उजुरीका सम्बन्धमा छानबिन गर्न उपाध्यक्ष अशोक राईलाई जिम्मा दिएको छ ।

स्रोतका अनुसार केही दिनअघि केन्द्रीय सदस्य आलम गोर्खालीका दाजुलाई लिएर राज्यमन्त्री अन्सारीलाई भेट्न गृह मन्त्रालय पुगेका थिए । उनले गोर्खालीलाई छुटाउन राज्यमन्त्री अन्सारीलाई प्रहरीका माथिल्ला अधिकृतहरूलाई निर्देशन दिन दबाब दिएका थिए । 'निर्दोष व्यक्ति फसेको छ, जसरी भए पनि उसलाई -गोर्खाली) बचाउनुपर्छ । तपाईंले प्रहरीलाई भन्नुपर्‍यो,' आलमले राज्यमन्त्री अन्सारीलाई भनेको उद्धृत गर्दै स्रोतले भन्यो ।

तर, राज्यमन्त्री अन्सारीले भने उनको दबाबलाई अस्वीकार गरेको स्रोतको दाबी छ । राज्यमन्त्री अन्सारीले गोर्खालीलाई छुटाउन आफूले पहल गर्न नसक्ने बरु यस सम्बन्धमा गृहमन्त्री भीम रावलसित आग्रह गर्न आलमलाई सुझाब दिएको स्रोतले जनाएको छ ।

आलमले भने गोर्खालीलाई जसरी पनि छुटाउन राज्यमन्त्रीसित भनेका थिए । आफ्नै नेताको बारम्बारको दबाबपछि राज्यमन्त्री अन्सारीले 'म बुझ्छु के रहेछ' भनेर जवाफ फर्काएको स्रोतले बतायो । आलमको दबाबअनुसार अन्सारीले त्यस्तो कुनै निर्णय गरेका छैनन् ।