उपकुलपति पनि प्लस टु व्यवसायमा

भवानीश्वर गौतम/नयाँ पत्रिका

काठमाडौं, ३० भदौ

विश्वविद्यालयका उपकुलपतिदेखि विभागीय प्रमुख र आंगिक क्याम्पसप्रमुखसम्मको निजी उच्चमाविमा संलग्नता रहेको पाइएको छ । उच्चमाविमा उनीहरूमध्ये कसैको लगानी छ भने कोही पढाएर तलबभत्ता खान्छन् ।

त्रिवि विश्वविद्यालय अनुदान आयोगका अध्यक्ष, काठमाडौं विश्वविद्यालयका उपकुलपति र उच्च माध्यमिक शिक्षापरिषद्का उपाध्यक्षसमेत निजी प्लस टुमा संलग्न पाइएका छन् ।

त्रिविका विभागीय प्रमुख, प्राध्यापकहरू र आंगिक क्याम्पसप्रमुखहरूसमेत नियमविपरीत यस्तो कार्यमा संलग्न छन् । आयोगका चारवटा केन्द्रीय विभागका प्रमुखले निजी कलेजमा आर्थिक लगानी नै गरेका छन् भने कतिपयले पढाउने काम पनि गर्छन् । त्रिवि केन्द्रीय विभागका दर्जन प्राध्यापकसमेत निजी कलेजमा संलग्न छन् ।

पदाधिकारी मात्र होइन, त्रिविका स्थायी शिक्षकले समेत कानुनी रूपमा कुनै निजी शिक्षणसंस्थामा संलग्न हुन पाउँदैनन् ।

त्रिविका केन्द्रीय गणित विभागप्रमुख प्रा. यादवप्रसाद कोइराला, जुलोजी विभाग-प्रमुख प्रा.डा. वसन्तकुमार थापा, ग्रामीण विकास विभाग-प्रमुख प्रा.डा. प्रदीपकुमार खड्का र अंगे्रजी विभाग-प्रमुख प्रा.डा. कृष्णचन्द्र शर्मा निजी प्लस टु तथा कलेजमा संलग्न छन् । प्रा. कोइराला पुरानो बानेश्वरस्थित न्यु समिट कलेज, थापा लैनचौरस्थित निस्ट कलेज, खड्का के एन्ड के कलेज र शर्मा गोल्डेनगेट कलेजमा संलग्न छन् ।

त्रिचन्द्र क्याम्पसका क्याम्पसप्रमुख हरिप्रसाद पराजुली ज्ञानेश्वरस्थित क्याम्पियन कलेजमा संलग्न छन् भने काठमाडौं विश्वविद्यालयका उपकुलपति प्रा.डा. सुरेशराज शर्मा ललितपुरस्थित आदर्श विद्यामन्दिरमा । उच्च माध्यमिक शिक्षापरिषद्का उपाध्यक्ष प्रा.डा. उपेन्द्र कोइराला ललितपुरस्थित डिएभी कलेज र गौरीशंकर कलेज, विराटनगरको विराट साइन्स क्याम्पसलगायतमा संलग्न छन् ।

उच्च शैक्षिक कार्यभार रहेका क्याम्पसप्रमुख, केन्द्रीय विभाग-प्रमुख र डिनले अन्य शिक्षण संस्थामा पढाउन तथा संलग्न हुन नपाउने व्यवस्था रहेको त्रिविका उपकुलपति माधवप्रसाद शर्माले बताए । उपकुलपति शर्माले नयाँ पत्रिकासँग भने, 'धेरै भार भएका क्याम्पस-प्रमुख, डिन, डाइरेक्टर, केन्द्रीय विभाग-प्रमुखले चौबीसै घन्टा पनि काम गर्नुपर्छ, अन्त पढाउन मिल्दैन ।' विश्वविद्यालयका स्थायी शिक्षकले भने विश्वविद्यालयबाट स्वीकृति लिएर मात्र विश्वविद्यालयमा पढाउने सिफ्टबाहेकको समयमा संलग्न हुन पाउने शर्माले जनाकारी दिए ।

विश्वविद्यालय अनुदान आयोगका अध्यक्ष तथा त्रिविका पूर्वउपकुलपति प्रा.डा. कमलकृष्ण जोशीको जेभियर कलेज र काइनस्टोन कलेजमा संलग्नता छ ।

त्यसैगरी, प्रा.डा. बालकृष्णको ललितपुरस्थित युनाइटेड एकेडेमी, व्यवस्थापन केन्द्रीय विभागकै प्रा.डा. कुन्दनदत्त कोइराला ह्वाइटहाउस कलेज, प्रा.डा. राधेश्याम प्रधान र प्रा.डा. मनोहरकृष्ण श्रेष्ठ सेन्ट जेभियर्स कलेज तथा प्रा.डा. पुष्कर प्रधान ग्लोबल कलेजमा संलग्न छन् । गणित केन्द्रीय विभागका डा. केदारनाथ उप्रेती गोल्डेनगेट इन्टरनेसनल कलेजमा संलग्न छन् ।

विराटनगरको महेन्द्र मोरङ क्याम्पसका गुणराज ढुंगेल र प्रमोद झा स्नातकोत्तर विराटनगर मेरिल्यान्ड कलेजमा संलग्न छन् । दर्जनजति त्रिविका लेक्चररहरूसमेत नियमविपरीत प्लस टुमा संलग्न रहेको पाइएको छ ।

अनशनकारी अस्पतालमा

काठमाडौं/ त्रिभुवन विश्वविद्यालय, आंशिक प्राध्यापक संघका दुईसूत्रीय माग राखी आमरण अनशन बसेकामध्ये लीलाराज बरालको स्वास्थ्यस्थिति चिन्ताजनक अवस्थामा पुगेपछि उनलाई त्रिवि शिक्षण अस्पतालमा भर्ना गरिएको छ । अनशनकै क्रममा बेहोस भएपछि अस्पताल लानुपरेको संघका सदस्य विष्णु पौडेलले बताए ।

अनशन बस्नेमा प्रेमकुमार विश्वकर्मा, अमृतेन्द्र कर्ण र बराल छन् । संघका सदस्य त्रिविका आंशिक शिक्षकलाई करार नियुक्त गरिनुपर्ने र नयाँ आउने शिक्षकको सेवासुविधा प्रस्ट पारिनुपर्ने मागसहित २२ भदौदेखि रत्नपार्कको शान्तिवाटिकामा आमरण अनशन बस्दै

आएका छन् ।