दबाबमा सिंहदरबार

नयाँ पत्रिका

काठमाडौं २५ कात्तिक

माओवादीले बिहीबार र शुक्रबार सिंहदरबारभित्र 'मुसो र बिरालो पनि' छिर्न नदिने घोषणा गरेको छ । तर, प्रधानमन्त्री माधवकुमार नेपालले बिहीबार नै मन्त्रिपरिषद् बैठक गर्ने तयारी गरेका छन् । दुईमध्ये एक पक्ष 'ब्याक' नभए झडप चर्कने खतरा छ ।

सेनापतिलाई कारबाही गर्ने सरकारी निर्णय उल्टाउने राष्ट्रपतिको कदमविरुद्ध माओवादीले सुरु गरेको दोस्रो चरणको आन्दोलनको अन्तिममा बिहीबार र शुक्रबार मुलुकको सर्वोच्च प्रशासनिक क्षेत्र सिंहदरबार घेराउ गर्दै छ । तर, बिहीबार मन्त्रिपरिषद् बस्ने तयारी भएको छ ।

मन्त्रिपरिषद् बैठक बुधबारका लागि तय भएको थियो, तर अचानक बिहीबार सारिएको छ । बैठक सारिनुसँग माओवादी आन्दोलनको कुनै सम्बन्ध नभएको प्रधानमन्त्रीका प्रेस सल्लाहकार विष्णु रिजालले बताए । 'गिरिजाप्रसाद कोइरालालाई बाहिर लग्ने वा काठमाडौंमै उपचार गर्ने भन्ने विषयमा निर्णय गर्न डाक्टरको रिपोर्ट पर्खनुपर्ने भयो, त्यस्तै प्रधानमन्त्रीको आफ्नै स्वास्थ्य पनि खासै राम्रो भएको छैन,' रिजालले भने, 'त्यसैले बुधबार मन्त्रिपरिषद् बसेन ।' बुधबारको सट्टा बिहीबार बैठक बस्ने सम्भावना भए पनि यकिनसाथ आफूले भन्न नसक्ने उनले बताए ।

उता प्रहरी प्रधान कार्यालय स्रोतले भने बिहीबार मन्त्रिपरिषद्को बैठक बस्ने भएकोले मन्त्रीहरूलाई सकुशल सिंहदरबार छिराउने व्यवस्था गर्न सरकारबाट आदेश आएको बताएको छ । 'सारा मन्त्रीलाई सिंहदरबार छिराउनुपर्छ, के-कसरी गर्ने भन्ने जिम्मा तपाईंको हो,' प्रधानमन्त्रीले प्रहरी महानिरीक्षक रमेश चन्द ठकुरीलाई बोलाएर यस्तै निर्देशन दिएको स्रोतले बताएको छ ।

उता आन्दोलनरत माओवादीले भने सिंहदरबारभित्र कसैलाई पनि छिर्न नदिने दाबी गरेको छ । 'मन्त्री त के मुसो पनि छिर्न दिँदैनौँ, बिहीबार र शुक्रबार बिहान आठ बजेदेखि अपराह्न पाँच बजेसम्म मुसो र बिरालो पनि छिर्न दिन्नौँ,' माओवादी उपाध्यक्ष तथा संयुक्त राष्ट्रिय जनआन्दोलन संयोजन समितिका संयोजक डा. बाबुराम भट्टराईले भने ।

नाकाबन्दी तोडेर प्रधानमन्त्री, मन्त्री र कुनै पनि कर्मचारीलाई भित्र छिर्न नदिइने उनले स्पष्ट पारे । 'केही मान्छेलाई भित्र छिर्न दिने भए त हामीले आन्दोलन नै फिर्ता लिए भइहाल्यो नि,' डा. भट्टराईले भने, 'हामी शान्तिपूर्ण नाकाबन्दी गर्छौं, कोही भित्र छिर्न खोज्छ भने सुरुङ खने हुन्छ ।'

माओवादीले कम्तीमा पनि तीन लाख जनता उतार्ने र बिहान आठदेखि साँझ पाँच बजेसम्म सिंहदरबार ठप्प पार्ने दाबी गरेको छ । माओवादीले सिंहदरबार ठप्प पार्ने घोषणा गरेपछि मंगलबार सरकारले पूर्वघोषित निषेधित क्षेत्र बढाएको थियो । तर, थपिएको निषेधित क्षेत्र तोड्ने चेतावनी दिएपछि सरकारले क्षेत्र घटाएर पुरानै ठाउँमा ल्याएको छ ।

'सरकारले थप गरेको निषेधित क्षेत्र हटाएको छ, अब आन्दोलन शान्तिपूर्ण हुनेछ,' माओवादी केन्द्रीय सदस्य तथा नेवाः राज्य समितिका सेक्रेटरी नारायण दाहालले बुधबार साँझ नयाँ पत्रिकासँग भने, 'हामीले गर्न चाहेको जनप्रदर्शनमा लाखौँ जनता उतारेर देखाउने छौँ ।'

आठ ठाउँबाट घेराउ

माओवादीले सिंहदरबारवरिपरि आठ स्थानबाट घेराउ गर्ने योजना बनाएको छ । पुतलीसडकस्थित पद्मोदय स्कुलअगाडि, भद्रकाली, माइतीघर मण्डला, बबरमहलस्थित सडक डिभिजन कार्यालयअगाडि, जिल्ला प्रशासन कार्यालयअगाडि, अनामनगर हनुमानथानअगाडि, घट्टेकुलो मिरमिरे एफएमअगाडि, कालिकास्थान सडकअगाडि घेराउ गर्ने माओवादी योजना छ ।

सिंहदरबार घेराउका लागि माओवादीले पार्टी कार्यकर्ता, जनवर्गीय संगठन, विभिन्न जिल्लाका गणतान्त्रिक मोर्चालाई परिचालन गर्दै छ । कार्यक्रमको व्यवस्थापन र सुरक्षाको जिम्मा सहायक संगठन वाइसिएलले लिएको छ ।

माओवादी पदाधिकारीहरूको मंगलबार बसेको बैठकले दोस्रो चरणको आन्दोलन अन्त गर्न मंगलबारसम्म भएका आन्दोलन शान्तिपूर्ण र सफल भएको ठहर गर्दै बिहीबार र शुक्रबारको सिंहदरबार घेराउ पूर्ण रूपमा शान्तिपूर्ण बनाउने निर्णय लिएको छ ।

माओवादीले उपत्यकासहित ताम्सालिङ, तमुवान र अबध राज्य समितिका जिल्लाबाट समेत जनसहभागिता गराई लाखौं जनता सिंहदरबार घेराउमा सहभागी बनाउने योजना बनाएको छ ।

सिंहदरबार घेराउका लागि शीर्ष नेता र सभासद्सम्मलाई अनिवार्य उपस्थित हुन माओवादीले निर्देशित गरेको छ । माओवादी संविधानसभा दलको कार्यालयले आफ्ना सभासद्लाई खाना खाएर बिहान सात बजे आफ्नो जिम्मा पाएको ठाउँमा जान निर्देश गरेको छ ।

माओवादीले सभासद्हरूलाई सभासद्को पोसाक र लोगोसहित उपस्थित हुन निर्देशन दिएको छ । माओवादीको संविधानसभा दलको कार्यालयका अनुसार त्यस दिन पद्मकन्या माविनजिक माओवादी नेवाः राज्य समितिका सभासद्, भद्रकालीनेर ताम्सालिङ राज्य समितिका सभासद् र माइतीघर मण्डलानेर मगरात राज्य समितिका सभासद् सिंहदरबार घेराउमा सहभागी हुनेछन् ।

त्यसबाहेक बबरमहलस्थित सडक डिभिजन कार्यालयअगाडि थारुवान राज्य समितिका, जिल्ला प्रशासन कार्यालयअगाडि भेरी-कर्णाली राज्य समितिका, अनामनगर हनुमानथाननेर अबध र तमुवान राज्यसमितिअन्तर्गतका, घट्टेकुलो चोकनेर लिम्बुवान र किराँत राज्य समितिका र कालिकास्थाननेर कोचिला राज्य समिति र मनोनीत सभासद् सिंहदरबार घेराउका लागि सहभागी हुनेछन् ।

माओवादी अध्यक्ष प्रचण्ड पनि सिंहदरबार घेराउमा सहभागी हुँदै छन् । प्रचण्ड, पार्टीका उपाध्यक्ष किरण, महासचिव बादल र नेवाः राज्य समितिका इन्चार्ज हितमान शाक्यले भद्रकालीबाट घेराउ गर्ने छन् । त्यस ठाउँमा मजदुर संगठनले घेरा गर्दै छ ।

उपाध्यक्ष डा. बाबुराम भट्टराई, सचिव पोष्टबहादुर बोगटी दिवाकरसहितको टोलीले माइतीघर मण्डलामा घेराउको नेतृत्व गर्दै छ । यहाँबाट गणतान्त्रिक मञ्च, धादिङ, चितवन र मकवानपुरबाट आएका माओवादी कार्यकर्ताले घेराउ दिनेछन् ।

उपाध्यक्ष नारायणकाजी श्रेष्ठ प्रकाश, सचिव सिपी गजुरेलले पद्मोदय मोडअगाडिको टोलीको नेतृत्व गर्नेछन् । यहाँ काठमाडौं, नुवाकोट र चितवनका माओवादी कार्यकर्ता तथा ती जिल्लाबाट सहभागी हुनेले सिंहदरबार घेराउ गर्नेछन् ।

स्थायी समिति सदस्य कृष्णबहादुर महरा, लीलामणि पोखरेलले काठमाडौं जिल्ला प्रशासन कार्यालयअगाडिबाट घेराउ गर्ने टोलीको नेतृत्व गर्नेछन् । यहाँ विद्यार्थी संगठन र सिन्धुपाल्चोक जिल्लाका माओवादी कार्यकर्ताले घेराउ दिनेछन् ।

यस्तै स्थायी समिति सदस्य अमिक शेरचन, वर्षमान पुन अनन्त, पम्फा भुसालले सडक डिभिजन कार्यालयअगाडिबाट घेराउको नेतृत्व गर्नेछन् भने त्यहाँ माओवादीको ललितपुर जिल्लाले घेराउ गर्ने नेवाः सेक्रेटरी दाहालले जानकारी दिए । स्थायी समिति सदस्यद्वय देव गुरुङ र टोपबहादुर रायमाझीले हनुमानथानबाट नेतृत्व गर्नेछन् । भक्तपुर र काभ्रेका माओवादी कार्यकर्ताले यहीँबाट घेराउ दिनेछन् ।

अनामनगर घट्टेकुलो चोकबाट स्थायी समिति सदस्य नेत्रविक्रम चन्द विप्लव र प्रवक्ता दीनानाथ शर्माले घेराउ टोलीको नेतृत्व गर्नेछन् । यहाँ गणतान्त्रिक मञ्चले घेराउ गर्नेछ ।

कालिकास्थानबाट स्थायी समिति सदस्य गिरिराजमणि पोखरेल, हिसिला यमी र कृष्णदास श्रेष्ठले नेतृत्व गर्ने नेवाः राज्य समितिले जानकारी दिएको छ । यहाँ बुद्धिजीवीले घेराउ गर्ने माओवादीले जनाएको छ ।

१५ कात्तिकबाट सुरु भएको माओवादीको दोस्रो चरणको आन्दोलन शुक्रबारको सिंहदरबार घेराउसँगै सकिँदै छ । आफ्ना माग पूरा नभए अझ सशक्त तेस्रो चरणको आन्दोलनमा जाने निर्णय मंगलबार बसेको माओवादी पदाधिकारीहरूको बैठकले लिएको छ । माओवादीले तेस्रो चरणको आन्दोलनमा आमहड्ताल गर्ने संकेत दिएको छ ।

यसअघि माओवादीले अन्तर्राष्ट्रिय समुदायको आग्रहमा हवाई नाकाबन्दी तथा आन्तरिक तयारी नभएको भन्दै गणराज्य घोषणाको कार्यक्रम फिर्ता लिएको थियो ।

सेनापति प्रकरणमा राष्ट्रपतिले चालेको कदम सच्चिनुपर्ने तथा नागरिक सर्वोच्चता वहाली हुनुपर्ने माग गर्दै १५ कात्तिकदेखि माओवादीले दुई साता लामो दोस्रो चरणको आन्दोलन सुरु गरेको थियो ।

नाचगानसहित घेराउ गर्ने

गाविस, नगरपालिका र जिल्ला प्रशासन कार्यालय घेराउ तथा उपत्यका नाकाबन्दीमा जस्तै सिंहदरबार घेराउलाई पनि माओवादीले उत्सवका रूपमा सम्पन्न गर्ने योजना बनाएको छ । विभिन्न बाजागाजासहित आएका माओवादी कार्यकर्ताले प्रचण्डले भनेजस्तै आन्दोलनलाई 'उत्सव'का रूपमा मनाउने बताएका छन् । दर्जनौं ठाउँमा लाउडस्पिकर लगाएर नाचगाच गर्ने, विभिन्न झाँकी प्रस्तुत गर्ने र अन्य साहित्यिक कार्यक्रमसमेत गर्ने माओवादी योजना छ । सांस्कृतिक कार्यक्रम, कविता, नाचगान गर्दै आन्दोलनलाई मनोरञ्जनात्मक गरिने नेवाः राज्यका सेक्रेटरी दाहालले जानकारी दिए ।