न्याय खोज्दै यातनापीडित श्रीमती

बाँके/ श्रीमान्को यातनाबाट पीडित बर्दियाकी १५ वर्षीया श्रीमती न्यायको खोजीमा भौंतारिइरहेकी छिन् । यातना सहन नसकी घर छाडेर हिँडेको दुई साता बितिसक्दा पनि प्रहरी प्रशासन र अधिकारवादीले न्यायका लागि पहल नगरेको उनको गुनासो छ ।

नेउलापुर-४ रानीपुरकी रञ्जना योगी अहिले न्यायका लागि सदरमुकाम गुलरिया धाइरहेकी छिन् । बर्दिया राजापुरका ३५ वषर्ीय सतिष शाहीसँग एक महिनाअघि विवाह बन्धनमा बाँधिएकी रन्जनाले विवाह गरेको १० दिनपछि नै श्रीमान्ले यातना दिन थालेको बताइन् ।

'बिहे गरेर घरमा लगेको १० दिनपछि काम गर्न भारत जा भने, जान नमानेपछि यातना दिन थाले,' रन्जनाले भनिन् । श्रीमान्ले दिनहुँ यातना दिएर घरबाट निकालेपछि न्याय खोज्दै धेरैतिर भौंतारिएको, तर कसैले पनि सहयोग नगरेको उनको गुनासो छ । 'भारत जान्नभन्दा चरम कुटपिट गरी घाँटीमा सल बेरेर मार्न खोजे,' घाँटीमा लागेको सलको डाम देखाउँदै रन्जनाले भनिन् ।

श्रीमान् सतिषले दिनभरि ढोका थुनेर राख्ने र दिसा-पिसाब गर्न जाँदासमेत जेठीपट्टकिा छोरीहरूले निगरानी राख्ने गरेको उनले बताइन् । रन्जनाका अनुसार सतिषकी जेठी श्रीमतीपट्टि चार छोरी छन् । उनले न्यायका लागि इलाका प्रहरी कार्यालय भुरी गाउँमा निवेदन दिएको बताइन् ।

पीडक पक्षले सो घटनालाई बाहिर नलैजान भन्दै ८० हजार रुपैयाँ लिएर मिल्न आग्रह गरेको थियो । तर, आफूले पैसा नलिएर पीडकलाई कानुनी दायरामा ल्याएर कारबाही गर्न चाहेको रन्जनाको दाबी छ ।

बार एसोसिएसन बर्दियाका उपाध्यक्ष एवं महिला हिंसाविरुद्ध काम गरिरहेको आवाज संस्थाका कानुनी सल्लाहकार केशव जिसीले प्रहरीले जाहेरी दर्ता गर्न नमानेको बताए । जिल्ला प्रहरी कार्यालय बर्दियाका प्रहरी उपरीक्षक गणेश केसीले भने पीडित पक्षले मुद्दा दर्ता गर्न चाहे बुझेर दर्ता गर्ने बताए ।

श्रीमान् भागेपछि बिचल्ली

झापा/ सुत्केरी हुने वेलामा श्रीमान् भागेपछि झापा अनारमनीस्थित सुकुम्बासी बस्तीकी एक महिलाको बिचल्ली भएको छ । चोकमागु-३ पाँचथर घर भएकी २१ वर्षीया सविना कार्कीलाई पाँचथर यासोकका अनुप परियारले सुत्केरी हुनु दुई दिनअघि छाडेर भागेका हुन् ।