नरोकिने भयो पशुबलि

गढीमाई मेलाको तयारी पूरा

नयाँ पत्रिका

बारा, २१ कात्तिक

अत्यधिक पशुबलिका कारण चर्चित बाराको गढीमाईमा लाग्ने पञ्चवषर्ीय मेलाको सम्पूर्ण तयारी पूरा भएको छ । विभिन्न क्षेत्रबाट विरोध र तपस्वी रामबहादुर बम्जनको पहलका बाबजुद यसपटक पनि बलिका नाममा लाखौँ पशुको हिंसा हुँदै छ ।

मेलाको तयारीका लागि करिब ६ महिनाअघिदेखि गढीमाई विकास समिति, गढीमाई मेला संरक्षण समिति र स्थानीय बासिन्दा जुटेका थिए । जिल्लाका विभिन्न गाविसबाट मेलामा पुग्ने पाँचवटा मूलबाटो तयार भइसकेको र अन्य सहायक मार्गमा समेत जिविस बाराले ग्रयाभेल बिछ्याउने कार्य पूरा गरेकाले विगतमा जस्तो मन्दिर पुग्न समस्या नहुने संरक्षण समितिले जनाएको छ ।

करिब तीन वर्गकिलोमिटरभन्दा बढी क्षेत्रफलभित्र सञ्चालन हुने सो मेलामा यातायात, बिजुली, पानी, औषधिबाहेक दर्शनार्थीलाई निःशुल्क आवास र शौचालयका लागि जिल्लास्थित करिब ५० संघसंस्थाले मागेअनुसारको जग्गा समितिले उपलब्ध गराइसकेको छ । भारतीय, र नेपाली गरी एक करोडभन्दा बढी दर्शनार्थीको उपस्थिति रहने सो मेलामा पशुबलि दिनका लागि आधुनिक बधशालासमेत निर्माण भइसकेको छ ।

यसपटकको मेलामा १५ हजारभन्दा बढी राँगा, दुई लाखभन्दा बढी बोका र लाखौँको संख्यामा हाँस, कुखुरा र परेवाको बलि दिइने गढीमाई मन्दिरका मूलपुजारी मंगल चौधरीकोे दाबी छ । उनी भन्छन्, 'यो संख्या अघिल्लो मेलाको भन्दा केही बढी मात्र हो ।'

बलिका लागि उपयुक्त घरेलु हतियार खुँडा लिई आउने करिब तीन सय दक्ष व्यक्तिलाई प्रहरी प्रशासन र समितिको रोहवरमा बलि-पास दिई खटाइने पुजारी चौधरीले बताए । मेला व्यवस्थित गर्न १५ सयभन्दा बढी स्वयंसेवक खटिने समितिले जनाएको छ । मेलामा नेपाल प्रहरीको १८ वटा सुरक्षा-पोस्ट रहने प्रमुख जिल्ला अधिकारी तारानाथ गौतमले जानकारी दिए ।

मेलामा मनोरञ्जनका लागि भारत र नेपालका सर्कस, थियटर, कन्सर्ट आदि रहनेछन् भने सयौँ होटललाई जग्गा भाडामा दिएको समितिले जनाएको छ ।

मन्दिर पुग्नका लागि भारतको घोडासन, छोडादानो, आदापुर, रक्सोल रेल्वे स्टेसनका साथै नेपालको वीरगन्ज र पथलैयाबाट बसको व्यवस्था हुने प्रचार उपसमितिले जनाएको छ ।

गढीमाई क्षेत्र विकाश र मेला प्रवर्धनका लागि सरकारले गत वर्ष ८० लाख रुपैयाँ निकासा गरेको थियो ।

यसरी सुरु हुन्छ बलि

गढीमाईमा पशुबलि दिने भाकल गरेपछि मनमा चिताएको कुरा पुग्ने जनविश्वास रहेकाले नेपाल र भारतका सर्वसाधारणले राँगा, बोका, कुखुरा र हाँसको बलि दिने परम्परा छ । यस वर्ष गढीमाई मन्दिरमा मंसिर ९ गते विधिवत् बलि सुरु हुनेछ ।

मन्दिरसँगै रहेको बलि दिने ठाउँ बह्मस्थानमा स्थानीय झाँक्री दुखा कछाडियाले आप\mनै शरीरको पाँच ठाउँबाट रगत निकाली 'नरबलि' दिएपछि तान्त्रिक विधिबाट बत्ती आफैँ बल्ने पुजारी चौधरीले दाबी गरे । उनका अनुसार बत्ती आफैँ बलेपछि बोका, सेतो मुसा, पाठी, भाले र सुँगुरको पञ्चबलि दिइन्छ र त्यसपछि सर्वसाधारणका लागि बलि खुला हुनेछ । बलि खुला भएको पहिलो दिन मंसिर ९ गते राँगा बलि हुने र १० गते बोका बलि हुने समितिले जनाएको छ । मेला एक महिना चल्नेछ ।