गढीमाईमा बलि सुरु

नयाँ पत्रिका

बारा, ८ मंसिर

बाराको गढीमाई मन्दिरमा सप्तमी तिथिका दिन मंगलबार बिहानदेखि बलि सुरु हुने भएको छ । सोमबार राति १२ बजेपछि विधिवत् रूपमा पूजा प्रारम्भ भई पञ्चबलि दिएपछि बलि खुला हुनेछ । मंगलबार एकै दिनमा १५ हजार राँगा बलि हुने बताइएको छ ।

बिधिवत् पूजापछि मदिरसँगै रहेको बलि दिने ठाउँ ब्रह्मस्थानमा स्थानीय झाँक्री दुखा कछाडियाले मंगलबार आप\mनै शरीरको पाँच ठाउँबाट रगत निकाली नरबलि दिनेछन् । त्यसपछि तान्त्रिक विधिबाट बत्ती आफै बल्ने र लगत्तै पञ्चबलि गरिने मन्दिरका मूलपुजारी मंगल चौधरीले बताए ।

पशुबलि दिनका लागि १५ हजारभन्दा बढी राँगा मन्दिरमा आइसकेको जनाउँदै मेला मूलसमितिका सचिव मोतीलाल कुशवाहले भने, 'मेला समयभित्र यो संख्या बढेर २० हजार नाघ्नेछ ।' बोका, हाँस र कुखुरा लाखौंको संख्यामा हुने उनको दाबी छ ।

पशुबलि मार हान्नका लागि जिल्लाका विभिन्न स्थानबाट दुई सय ५० दक्ष व्यक्तिलाई समितिले अनुमति दिइसकेको छ । उनीहरूले खुँडा, तरबार, खुकुरीलगायतका घरेलु हतियारले मार हान्नेछन् । मार हान्न अनुमति पाएका एकजनाले मेलाभर करिब पाँच सयसम्म मार हान्ने बताइन्छ ।

बलि रोकिने चर्चा भए पनि त्यसको केही असर नपरेको सचिव कुशवाहले बताए । उनी भन्छन्, 'भाकल गरेको पशुबलिका लागि मन्दिर ल्याउँछन्-ल्याउँछन्, रोकिने प्रश्नै छैन ।'

बलिका लागि पशु ल्याउने क्रम व्यापक रहेको र सबैले तिथिमै बलि गर्ने हुनाले चाप एक्कासि बढेको कुशवाहको भनाइ छ । 'हामी व्यवस्थापन गर्न सक्छौँ,' उनले भने ।

मंगलबार राँगाको र बुधबार बोकाको बलि हुने भए पनि मेला अवधिभर पशुबलि जारी रहनेछ । बलिको अघिल्लो दिन सोमबार २० लाखभन्दा बढी दर्शनार्थीको उपस्थिति रहेको समितिले जनाएको छ । देशका विभिन्न भागबाट सयौँ रिजर्भ र निजी सवारीसाधन तथा हजारौँ मोटरसाइकल मेलाक्षेत्रमा प्रवेश गरेको जिल्ला ट्राफिक प्रहरी कार्यालय बाराले जनाएको छ ।

मेलास्थलमा एक सय २५ ट्राफिक प्रहरी यातायात व्यवस्थापनमा जुटेका छन् । मेला अवधिभर हुने पशुबलिमा ७० प्रतिशत भारतको विभिन्न राज्यबाट र ३० प्रतिशत मात्रै नेपालबाट पशु आउने सचिव कुशवाहको दाबी छ ।

बोका र राँगा, कुखुरा हाँसको टाउको गाड्न एक बिघा क्षेत्रफलमा खाल्टो खनिएको छ । गढीमाईमा पशुबलि दिने भाकल गरेपछि मनमा चिताएको कुरा पुग्ने जनविश्वास रहेकाले नेपाल र भारतका सर्वसाधारणले गच्छेअनुसारको राँगा, बोका, कुखुरा र हाँसको बलि दिने परम्परा रहिआएको छ ।