बन्दले देशैभरि जनजीवन अस्त-व्यस्त

नयाँ पत्रिका

काठमाडौं, २१ मंसिर

माओवादीले आइतबार आह्वान गरेको नेपाल बन्दका क्रममा सप्तरीमा पसल बन्द गराउँदै हिँडेका चारजना माओवादी कार्यकर्तालाई प्रहरीले पक्राउ गरेको छ । सप्तरीको कञ्चनपुरबाट आइतबार चारजना पक्राउ परेका छन् ।

पक्राउ पर्नेमा पार्टीका जिल्ला सचिवालय सदस्य मानपुर चौधरी, मधेसी राष्ट्रिय मुक्तिमोर्चाका शत्रुधन यादव, रामबिहारी राउत र तारणी सरदार छन् । पक्राउ परेकालाई इलाका प्रहरी कार्यालय कञ्चनपुरमा राखिएको छ । यसैबीच एकीकृत माओवादी र कौशल सिंह नेतृत्वको ओबिसी महासंघले एकैदिन गरेको बन्दका कारण सप्तरीको जनजीवन प्रभावित भएको थियो ।

त्यस्तै, माओवादीले गरेको नेपाल बन्दका कारण आइतबार चितवन पूर्ण रूपमा प्रभावित बन्यो । माओवादी कार्यकर्ता बिहानैदेखि जिल्लाका विभिन्न नाका तथा बजारक्षेत्रमा जम्मा भएर प्रदर्शन गरेका थिए ।

बन्दका कारण चितवनमा कुनै पनि सवारीसाधन चलेनन् भने शैक्षिक संस्था, बजार, उद्योग तथा कलकारखाना पूर्ण रूपमा ठप्प रहे । बन्दकर्ताले एम्बुलेन्स, शववाहन, प्रेसका सवारीलगायतका अति संवेदनशील सवारीसाधनलाई चल्न दिए पनि अन्य सवारीसाधन भने चल्न दिएका थिएनन् । बन्द आह्वान गर्दै निस्केका समूहमा सुकुम्बासी, माओवादीको विद्यार्थी संगठन, अनेरास्ववियू क्रान्तिकारी समर्थित विद्यार्थी पनि थिए । नारायणगढको पुल्चोक, भरतपुरको चौबिसकोठी, पूर्वी चितवनको टाँडीबजारलगायतका स्थानमा माओवादी कार्यकर्ताले सडकमा टायर बालेर चर्काे नाराबाजी गरेका थिए ।

माओवादीले आइतबार गरेको नेपाल बन्दले सिन्धुपाल्चोकको जनजीवन प्रभावित भयो । बन्दले यातायात, होटल, पसल, शैक्षिक संस्था बन्द हुँदा यात्रु, व्यवसायी, विद्यार्थीलगायतले सास्ती खेप्न बाध्य भए ।

जिल्ला सदरमुकाम चौतारा, मेलम्ची, बाह्रबिसे, तातोपानीलगायत प्रमुख बजार बन्द गराइए । बन्द आह्वान गर्दै माओवादी कार्यकर्ताले विभिन्न स्थानमा बिहान जुलुस निकालेका थिए । जिल्लाका सात स्नातक क्याम्पस, ३६ उच्च मावि र पाँच सय ३९ सामुदायिक विद्यालयमा पठनपाठन भएन । शैक्षिक संस्था बन्द हुँदा परीक्षा दिइरहेका विद्यार्थी बढी मारमा परे ।

माओवादीको संयुक्त जनआन्दोलन संघर्ष समिति नेपालले आह्वान गरेको बन्दका कारण आइतबार दाङलगायत राप्तीको जनजीवन प्रभावित रह्यो । बन्दका कारण सवारीका कुनै पनि साधन गुडेनन् भने कलकारखाना, उद्योग, बजार बन्द रहे । बन्द आयोजकले सरकारी कार्यालयसमेत बन्द गराए । एम्बुलेन्स, प्रहरी भ्यान र छिटपुट मोटरसाइकल सञ्चालन भए भने मेडिकल, होटल र पिसिओमात्र खुलेका थिए ।

कैलाली घटनाको विषयमा माओवादीले आइतबार आह्वान गरेको नेपाल बन्दले पर्वतलगायत धौलागिरिको जनजीवन प्रभावित बन्यो । बन्दका कारण पोखरा-बाग्लुङ राजमार्गअन्तर्गतको भूपी शेरचन मार्गमा सवारी आवागमन ठप्प बन्यो भने सदरमुकामलगायत अन्य व्यापारिक केन्द्रसमेत बन्द रहे । माओवादी कार्यकर्ताले बिहानैदेखि नाराबाजीसहित बजार परिक्रममा गरेर बन्दका लागि आह्वान गरेका थिए ।

बन्दले निजी तथा सामुदायिक सम्पूर्ण शैक्षिक संस्था पनि बन्द भए । यातायात बन्दका कारण यातायात सुविधा र शैक्षिक संस्था बन्दले बालबालिका पढाइबाट वञ्चित भएपछि यात्रु तथा अभिभावक आक्रोशित बने । बन्दले ठाउँठाउँमा झडप भए पनि पर्वतमा अपि्रय घटना भएनन् । बन्दका कारण कपिलवस्तु पनि सुनसान भयो । बन्दकर्ताले सडकका ठाउँठाउँमा अवरोध सिर्जना गरेपछि पूर्व-पश्चिम राजमार्गमा कुनै पनि सवारीसाधन चलेका छैनन् । सडकमा एम्बुलेन्स, सञ्चारकर्मीका मोटरसाइकल तथा अन्य कुनै पनि सवारीसाधन चलेनन् ।

खोटाङमा पनि बन्दको प्रभाव पर्‍यो । सदरमुकाम दिक्तेलका बजार, पसल प्रभावित बने भने शैक्षिक संस्था पूर्ण रूपमा बन्द भए । तर, सरकारी कार्यालयमा भने नियमित काम भएको प्रमुख जिल्ला अधिकारी केशवराज आचार्यले बताए । आइतबारमात्रै २० वटा नागरिकता वितरण भएको प्रजिअ आचार्यले बताए ।

उता, उदयपुरमा भने एकीकृत माओवादीका कार्यकर्ताले बन्दको अवज्ञा गरेको भन्दै नेकपा माओवादी मातृका समूहका जिल्ला इन्चार्ज अखण्ड विद्रोहीलाई कुटपिट गरेका छन् । बन्दको अवज्ञा गर्दै इन्चार्ज विद्रोहीले मोटरसाइकल चलाएको भन्दै विद्रोहीलाई कुटपिट गरिएको थियो ।

मोरङमा बजार बन्द गराउँदै हिँडेका १५ माओवादी कार्यकर्तालाई प्रहरीले पक्राउ गरी छाडेको छ । उता, बन्दकर्ताले धनकुटामा दुग्ध विकास संस्थाको ट्रकसहित ६ वटा ट्रकमा तोडफोड गरेका छन् भने इलाममा प्रदर्शनकारीले मे२प ७८६८ नम्बरको मोटरसाइकलमा तोडफोड र मे२प १६२२ नम्बरको मोटरसाइकलमा आगजनी गरेका छन् ।

पूर्वका अधिकांश जिल्लामा बन्दको प्रभाव पर्‍यो । पूर्वका मोरङ, सुनसरी, सप्तरी, सिरहा, झापा, इलाम, पाँचथर, धनकुटा, खोटाङलगायतका जिल्लामा यातायात, शिक्षण संस्था तथा कलकारखाना बन्द रहे ।

बन्दको प्रभाव सुर्खेतमा पनि पर्‍यो । सुर्खेतमा बिहानैदेखि कलकारखाना, शैक्षिक संस्था, लामो तथा छोटो दूरीका सवारीसाधन चलेनन् । त्यस्तै, सम्पूर्ण सरकारी कार्यालय पनि बन्द रहे । माओवादी कार्यकर्ता र सुकुम्बासीले वीरेन्द्रनगरका विभिन्न चोकमा टायर बालेर प्रदर्शन गरे ।

बन्दको अवज्ञा गरेको भन्दै माओवादी कार्यकर्ताले दिउँसो क्षेत्रीय सिँचाइ, मालपोत र दूरसञ्चार कार्यालयमा समेत तालाबन्दी गर्नुका साथै ढुंगामुढाप्रहार गरे । दिनभरिको कार्यक्रमपछि साँझ माओवादीले मगलगडी चोकबाट मसाल जुलुससमेत निकालेको थियो ।