गुणस्तरहीन खाद्यवस्तु वितरण नगर्न आग्रह

वीरबहादुर गिरी/नयाँ पत्रिका

जाजरकोट, २५ भदौ

जिल्लास्थित राजनीतिक दलहरूले डिप्रोक्स नेपाल नामक गैरसरकारी संस्थालाई गुणस्तरहीन खाद्यान्न वितरण नगर्न आग्रह गरेका छन् । डिप्रोक्सद्वारा सदरमुकाम खलंगामा आयोजित वाषिर्क समीक्षा गोष्ठी कार्यक्रममा दलहरूले सो आग्रह गरेका हुन् ।

अघिल्लो वर्ष विश्व खाद्य कार्यक्रमअन्तर्गत डिप्रोक्सद्वारा जाजरकोटमा सञ्चालित कामका लागि खाद्यान्न कार्यक्रमले जिल्लाका १२ गाविसमा वितरण गरेको खाद्य वस्तुका कारण झाडापखाला महामारी फैलिएको उनीहरूको भनाइ थियो । चामलका कारण जाजरकोट लगायतका जिल्लामा झाडापखाला फैलिएको केही अधिकारवादी संस्थाहरूले प्रमाणित गरिसकेका छन् ।

झाडापखाला महामारी फैलिएका गाविसमा वितरित चामल, दाल सडेको, डल्ला परेको र नपाक्ने पाइएको थियो । मानवअधिकारवादी संस्था इन्सेकको पहलमा विश्वखाद्य कार्यक्रमअन्तर्गत डिप्रोक्सले जाजरकोटमा वितरण गरेको खाद्यवस्तको परीक्षणपछि गुणस्तरहीन प्रमाणित भएको थियो ।

कांग्रेस, एमाले, माओवादीलगायत जिल्लास्थित राजनीतिक दलका प्रमुखले डिप्रोक्सलाई चालू आर्थिक वर्षमा कार्यक्रम सञ्चालन गर्दा जनतालाई गुणस्तरहीन खाद्यवस्तु वितरण नगर्न निर्देशन दिएका छन् । पुनः खाद्य गुणस्तरप्रति बेवास्ता गरिए संस्थाको कार्यक्रम जिल्लाबाटै बन्द गर्ने चेतावनी दलले दिएका छन् ।

विश्व खाद्य कार्यक्रमको सहयोगमा गत वर्षमात्रै डिप्रोक्स नेपालले जाजरकोटमा १ हजार ५ सय ३४ मेटि्रक टन चामल र १ सय २५ मेटि्रक टन दाल वितरण गरेको थियो । डिप्रोक्स नेपालद्वारा वितरित चामल र दाल गुणस्तर नभएको पाइएकाले आउँदो वर्ष चामलको गुणस्तरप्रति ध्यान दिन र गत वर्ष बाँँडेको दाल यो वर्ष वितरण नगर्न निर्देशन दिइएको माओवादीका जिल्ला सचिव गणेशप्रसाद सिंहले जानकारी दिए ।

डिप्रोक्स नेपालले यो वर्ष जाजरकोटमा विश्वखाद्य कार्यक्रमको सहयोगमा खाद्य सुरक्षा तथा सहयोग कार्यक्रमअन्तर्गत २ हजार २ सय ८० मेटि्रक टन चामल र २ सय ८५ मेटि्रक टन दाल विभिन्न आयोजनाका लागि वितरण गर्ने तयारी भएको जनाएको छ । नागरिक समाजका प्रतिनिधिले दाताको सहयोगमा उपलब्ध खाद्यवस्तुको गुणस्तरप्रति बेवास्ता गरेको भन्दै सो संस्थाको आलोचना गर्दैर् आएका छन् ।