एउटा गीत गाएको १५ हजार

संगीतकार शम्भुजित बास्कोटाले एउटा गीत गाएको पारिश्रमिक कति लेलान् ? पाँच-सात हजार । कसैले यही आँकलन गर्छ भने त्यो अनुमान गलत छ । सुन्दा अचम्म लाग्ला, उनले एउटा गीत गाउनका लागि आफ्नो पारिश्रमिक तोकेका छन्- पन्ध्र हजार !

सोभित बस्नेतको निर्देशनमा निर्माण हुन लागेको राज फिल्मको घरमा हेर्‍यो घरमै टेन्सन बाहिर हेर्‍यो बाहिरै टेन्सन... बोलको एउटा गीत गाउन फिल्मका निर्माता गजेन्द्र रञ्जित र मोहनकृष्ण श्रेष्ठले शम्भुजितलाई 'अफर' गर्दा सुरुमा उनले 'म गाउँदिनँ । मेरो रेट हाई छ । निर्माताले तिर्न सक्दैनन्' भनेर तर्किए । उनको 'रेट हाई' भएको सुनेपछि निर्माताद्वय मुखामुख गर्न थाले । कुनातिर गएर एकछिन कानेखुसी गरेपछि दुवै निर्माता शम्भुजितसामु आई बोले, 'भन्नुस् न त तपाइर्ंको रेट कति हो ? हामी तिर्न तयार छाँै ।'

निर्माताको आँट शम्भुजितले पत्याएनन् । दुवैलाई तलदेखि माथिसम्म हेरेर उनी बोले, 'उदितनारायणले एउटा नेपाली गीत दस हजारमा गाउँछ । अरू नेपाली गायकले चार पाँच हजार पाउँछन् । मेरो रेट अझै धेरै छ । कुरै नगरौँ ।'

आफ्नै फिल्मको संगीतकारले भाउ खोजेपछि निर्माता पनि के कम ? फेरि सोधे, 'भन्नुस् न त तपाइर्ं कति लिनुहुन्छ ? जति भने पनि हामी दिन तयार छौँ ।' त्यसपछि भने शम्भुजित मुखै फोर्न बाध्य भए । भने, 'म पन्ध्र हजार घटी गाउँदिनँ ।' शम्भुजितको 'रेट' सुनेर निर्माताद्वय फेरि मुखामुख गर्न थाले । अनि छायो शम्भुजितको मुहारमा कुटिल मुस्कान । बोले, 'मैले भनेको होइन । म अलि चर्काे छु...' उनको कुरा भुइँमा खस्न नपाउँदै निर्माताद्वयले खनखनी पन्ध्र हजार रुपैयाँ उनकै अगाडि गनिदिए ।

आफूले डिमान्ड गरेको दाम आँखैअगाडि गनिएपछि शम्भुजित एकछिन अलमल्लमा परे । अनि घाँटी मिलाएर पैसा गोजीमा हाल्दै बोले, 'रेकर्डिङ सेड्युल कहिलेलाई राखौँ ?'

मंगलबार स्टुडियोमा गीत गाइरहेका शम्भुजितलाई एउटा गीत गाउनका लागि चर्काे रकम लिएको बारेमा जिज्ञासा राख्दा 'निर्माता भाइहरूले तपाइर्ंकै स्वर चाहिन्छ भनी जिद्दी गरेकाले गाएको' बताए । भने, 'म जस्तो- तस्तो गीत गाउँदिनँ । नयाँ आएका गायक भाइहरूले पनि गरेर खाऊन् भनेर 'चुजी' भएको हुँ । करै गरेर मेरो रेट तिरेपछि त गाउनै पर्‍यो नि !'

सुरुमा अन्कनाएका निर्देशक सोभितले शम्भुजितको स्वरका लागि पन्ध्र हजार तिरिएको स्विकारे । भने, 'निर्माताले कम्प्रोमाइज गर्न चाहेनन् ।' शम्भुजितले गाइरहेको उक्त गीतमा पपगायक राम श्रेष्ठले पनि स्वर दिएका छन् ।

स्टुडियोका एक प्राविधिक शम्भुजिततिर हेरेर खुस्खुसाए, 'धन देखपछि महादेवको त तीन नेत्र हुन्छ भन्छन्, यी त झन् शम्भु न परे । त्यसमाथि जित । किन छोड्थे यिनले नगदनारायण !'